23a a vis Hedra 2016

Gorthugher da, ha dynnargh dhe dhyllans a’n seythen ma 'An Nowodhow' war BBC Radyo Kernow.

Good evening, and welcome to this week’s edition of ‘An Nowodhow’ (‘The News’) on BBC Radio Cornwall.

An seythen eus passyes, pyskadoryon dhyworth pub parth a’n ranndir Soth- West a omguntellas dhe Bennsans rag omgussulya a-dro dhe’n effeyth a Vrexit war an diwysyans pyskessa.

A-gynsow y’n gwerinvota, brassa rann a byskadoryon a votyas dhe asa an E.U. ha lemmyn, y lever meur anedha bos govenek dhedha Brexit dhe brovia chonsyow pals rag gwellhe aga diwysyans y’n termyn a dheu.

Lies pyskador a vynnsa settya grugys eskeans a dhew kans mildir a-dro dhe’n Ruvaneth Unys yn le an finweth a-lemmyn a dhewdhek mildir hag a veu akordys gans an E.U. Saw, drefen nag yw aswonnys hwath mar kwra an Ruvaneth Unys gasa an varghas unnik europek, y fydh res martesen dhe wul kesassoylyans gans an E.U. a-dro dhe’n mater tyckli ma.

Pur dhe les yw an varghas europek rag puskes dhe’n Ruvaneth Unys. Y’n eur ma, esperthys dhe’n E.U. yw pymp kansrann ha peswar ugens a’n puskes krogenyek kemerys yn dowrow bretennek.

Pyskador, James Roberts, neb a wolyas yn y gok pyskessa bys dhe Westminster rag skoodhya an kaskyrgh rag gasa an E.U., a leveris yn keswel gans an BBC, bos res dhe byskadoryon oberi oll warbarth may fe kevys towl meur y les dhe’n diwysyans tien.

Dres henna, mar kallo an governans gul akord faverus gans an E.U. wosa Brexit, yma govenek dhe’n byskadoryon may hallons i kenertha moy tus yowynk dhe hwilas resegva sewen y’n diwysyans pyskessa.

Last week, fishermen from all over the South West held a meeting at Penzance to discuss the effect of Brexit on the fishing industry.

In the recent referendum, a majority of fishermen voted to leave the EU and many of them now say that they hope that Brexit will provide many opportunities to improve their industry in the future.

Many fishermen would like to set a two hundred mile exclusion zone around the UK in place of the current limit of twelve miles which was agreed with the EU. However, because it is not yet known whether the UK will leave the European single market, it will perhaps be necessary to compromise with EU on this thorny issue.

The European market for fish is very important to the UK. Currently, eighty- five percent of shellfish caught in British waters is exported to the EU.

Fisherman James Roberts, who sailed to Westminster in his fishing boat to support the campaign to leave the EU, said in an interview with the BBC that it was necessary for all fishermen to work together so that a plan could be found which was advantageous to the whole industry.

Moreover, if the government manages to reach a favourable agreement with the EU after Brexit, the fishermen hope that they may be able to encourage more young people to seek a successful career in the fishing industry.

Servisyow kreslu, tan ha karr klavji yn Kernow ha Dewnens a wra trenya warbarth gans an luyow ervys rag ombareusi dhe dhyghtya goredhommow bras kepar ha deray poblek, gostlow po broweghereth.

Awos treghow arghansek, an servisyow re erviras kesoberi moy yn ogas an eyl gans y gila. Ytho, y fydh moy es mil esel a’n servisyow divers ow kemeres rann y’n trenyans dhe dreveglos fug y’n tenvaow an lu war Woon Salisbury. Aswonnys avel ‘Oberyans Konkwerror’, y krysir bos hemma an kynsa prys y feu restrys oberyans mar vras a’n par ma.

Paul Netherton, dhyworth kreslu Kernow ha Dewnens, hag usi ow kesordena an oberyans, a leveris na vedha an oberyans restrys rag gortheneba orth neb godros arbennek, mes may hallsa an servisyow diogeledh bos parys dhe

dhierbynna lies eghen a hwarvos, kepar ha droglam tren po jynn ebron rag ensampel.

Police, Fire and Ambulance services in Devon and Cornwall will be training with the armed forces in preparation for dealing with large-scale emergencies such as public disorder, riots and terrorism.

Because of financial cuts, the services have decided to work more closely together. So, there will be more than one thousand members of the various services taking part in the training at a mock village on the army firing-range on Salisbury Plain. Known as ‘Operation Conqueror’, this is thought to be the first time that such a large-scale operation of this kind has been organised.

Paul Netherton of Devon and Cornwall police, who is co-ordinating the operation, said that the operation had not been arranged to confront any specific threat but so that the security services might be ready to counter many kinds of incident, such as a train or plane crash for example.

Kok pyskessa Kernewek, meur y danowder, a allsa bos dralyes yn temigow ha gwerthys avel skoll mar ny kevir nebonan a vynno y brena.

An kok leska, ‘White Heather’ y hanow, hag aswonnys avel ‘lugger’ yn Sowsnek, a veu gwrys dhe Logh yn mil, naw kans, hwegh warn ugens. Y’n jydh hedhyw, nyns eus marnas deg kok warn ugens a’n keth par hwath yn usyans.

Dres termyn hir, y feu an ‘White Heather’ devnydhys avel kok pyskessa kyns bos treylyes dhe lester-gwari privedh. Yn dew vil ha tri, ev a wrug trumach dhe Afrika, hag alemma bys dhe Vrasil, kyns dehweles tre dres an Mor Karyb.

Y’n eur ma, y kevir an kok yn porth Brystow, mes ny vynn y berghen, Gerard Ginestier, y witha moy. Dres diw vledhen lemmyn, ev re beu owth assaya y wertha, mes heb seweni. Mar nyns yw trovyes perghen nowydh, y fydh an kok dralyes. Mester Ginestier a leveris y fedha hemma tenkys methus rag an lester istorek ma.

An extremely rare Cornish fishing boat could be broken up and sold as scrap if a buyer is not found for it.

The boat, named ‘White Heather’, known as a ‘lugger’ in English, was built in Looe in 1926. Today, there are only thirty boats of this kind still in use.

For a long time, the ‘White Heather’ was used as a fishing boat before being converted to a private yacht. In 2003, it sailed to Africa, then on to Brazil before returning home via the Caribbean.

Currently, the boat can be found at Bristol, but its owner, Gerard Ginestier, no longer wishes to keep it. For two years now, he has been trying to sell it but without success. If a new owner is not found, the boat will be broken up. Mr Ginestier said that this would be an ‘ignominious end’ for this historic vessel.

Yth esowgh hwi ow koslowes orth ‘An Nowodhow” war BBC Radyo Kernow. An dowlen an seythen ma a veu skrifys ha presentys genev vy, Steve Penhaligon. Bys dy’ Sul nessa, nos da dhywgh hwi oll.

You are listening to ‘An Nowodhow’ on BBC Radio Cornwall. This week’s programme was written and presented by me, Steve Penhaligon. Until next Sunday, good night to you all.