27ves a vis Hedra 2019

Dohajydh da, ha dynnargh dhe dhyllans an seythen ma ‘An Nowodhow’ war BBC Radyo Kernow.

Good afternoon, and welcome to this week’s edition of An Nowodhow on BBC Radio Cornwall.

Res re beu moy a sawyansow yn Treth Lanngorrow pub bledhen a-dhia ban veu arnewys fos yn dew vil peswardhek. Heb an fos-gwitha yth yw rydh an Dowr Gwyles dhe wia dres an treth, yn-dann janjya patron an mortidys ha gul frosow-skwardya. Yma tewynnow a-wartha dhe’n treth ow kila, drefen an avon dhe esknias aga grond. Fondyans Skath Sawya Kenedhlek Riel (RNLI) a leveris bos ugens sawyans yn Treth Lanngorrow yn dew vil tredhek, ha’n niver dhe gressya yn fast dhe deg ha tri-ugens yn dew vil etek. I a leveris dhe guntelles poblek bagas-lewya studhyans treth an Gwyles y halsa an treth “andharganadow ha dynamek”.

Pywvedhys yw an treth gans Duketh Kernow ha Trest Kenedhlek, ha derivas desedhys gans an Dhuketh a leveris y kos’sa kekemmys ha dew poynt peswar milvil a beunsow dhe aslea an fos-gwitha, hag y fe edhom anodho arghans a bris rag y ventena. An bagas-lewya a vynna kowlwul towl sawder an treth rag gwellhe adhyskans an dus a wra devnydh a’n treth, ha leverel lok kressyes a wythysi trethow dhe allos bos rann an remedi. Yn-medh esel an bagas-lewya, Dr Ben Dobson a Gonsel an Bluw Lanngorrow, “An hav ma ni a’gan beu milyow a dus war an treth, ha ny hwarva droglammow sevur, hag yma pub reson dhe dhos dh’agan treth teg.”

More rescues have been needed at Crantock Beach every year since storms damaged a wall in 2014. Without the retaining wall, the River Gannel has free to weave across the beach, changing tidal patterns and creating rip currents. Dunes at the top of the beach are also receding as the river erodes their base. The RNLI said there were 20 rescues at Crantock beach in 2013, and that the number has steadily increased to 70 in 2018. They told a public meeting of the Gannel beach study steering group that the popular beach had become “unpredictable and dynamic”.

The beach is owned by the Duchy of Cornwall and the National Trust, and a report commissioned by the Duchy said that replacing the retaining wall could cost as much as £2.4m, and that it could require significant money to maintain it. The steering group wanted to implement a beach safety plan to improve education of people using the beach, and said that increased lifeguard presence could be part of the solution. A member of the steering group, Dr Ben Dobson from Crantock Parish Council, said: “This summer we have had thousands of people on the beach and there have been no serious accidents and there is every reason to come to our beautiful beach.”

Y feu ygerys wosa meur es hanterkans bledhen kowfordhow mayth o gwrys devnydh dhodho rag treusperthi pri gwynn bys yn Porthmeur West. An kowfordhow yn-dann Withti Gwreck a omdhiskwedh kevreyth gwreydhek a hyns horn, keffrys ha’n gravathow rag degi pri war an skathow a waytya.

Tunnels that were used to transport china clay to the harbour at Charlestown have been opened after more than 50 years. The tunnels under the Shipwreck Museum feature the original rail system, as well as the gurneys used to shift clay on to the waiting ships.

Y feu daskorrys bedhow a bymthek den avel rann kovheans a benn kansvloodh a derosa balweyth. An ugensves a vis Hedra mil naw kans ha nownsek y tiskaras an kevreyth treusporth a brenn, “Yskynnel Den” y hanow, yn-dann ladha unnek den warn ugens yn Bal Sten ha Kober Levant. An droglam na o dalleth diwedh an bal, a dhegeas yn mil naw kans tredhek warn ugens. Unn den bal heb hanow, pymthek bloodh y oos pan oberi ev ena, a leveris dhe’n BBC yn mil naw kans onan ha tri-ugens, “My a welas golok na vynnav vy gweles arta. Yth o res tri dydh rag daskavos an tus a via maglennys y’n shafta, hag onan den goliys a veu dres yn mes byw.”

The graves of 15 men have been restored as part of the centenary commemorations of a mining disaster. On 20 October 1919, the wooden transportation system called a “Man Engine” collapsed, killing 31 men in the Levant tin and copper mine. The accident was the beginning of the end of the mine, which closed in 1933. One unnamed miner, who was 15 when he worked there, told the BBC in 1961: “I saw a sight which I don’t want to see again. It took three days to recover the men who had been trapped in the shaft and one man who was wounded and brought out alive.”

Kochyas an Vorladron, Gavin Cattle y hanow, a braysyas brysoleth vudhek a y bara, wosa i dhe waynya peswar ha dew-ugens dhe pymp warn ugens yn Doncaster an bennseythen usi passyes. Yn-medh Cattle dhe BBC Kernow, “Res yw dyski dhe waynya fyttys pan na wra hi mos da yn tien ynwedh.”

Cornish Pirates’ Coach Gavin Cattle praised his side’s winning mentality after they won 44-25 at Doncaster last weekend. Cattle told BBC Cornwall, “You’ve got to learn to win games when it’s not quite going your way as well.”

Yth esowgh hwi ow koslowes orth “An Nowodhow” war BBC Radyo Kernow. An dowlen an seythen ma a veu skrifys ha presentys genev vy, Wella Morris. An pennskrifer o John Parker. Bys dy’Sul nessa, dydh da dhywgh hwi oll.

You’ve been listening to An Nowodhow on BBC Radio Cornwall. This week’s script was written by me, Wella Morris. The editor was John Parker. Until next Sunday, good day to you all.