10ves a vis DU 2019

Dohajydh da, ha dynnargh dhe dhyllans an seythen ma ‘An Nowodhow’ war BBC Radyo Kernow.


Good afternoon, and welcome to this week’s edition of An Nowodhow on BBC Radio Cornwall.

Konsel Kernow re beu res arvreusyans “a bris” rag y wonisyow fleghes, yn derivas Ofsted dyllys dy’Meurth.

Lemmyn, yma gonisyow fleghes yn Kernow yn mysk an ughella deg kansran y’n pow. Konsel Kernow yw an awtorita unnik y’n ranndir Soth-West re beu breusys “a bris”.

An hwithrans a hwarva yn mis Hedra. Yth esa y fog war an gnas a with rag fleghes an moyha goliadow yn Kernow.

Kevarwodher Gonisyow Fleghes a-barth Konsel Kernow, Trevor Doughty, a leveris: “An hwithrans a fogell war wonisyow fleghes an konsel. Mes an kowlwrians ma a dhiskwedh an fordh mayth ober war-barth an konsel ha’y geskowetha rag gwellhe an bewnansow a fleghes hag a yonkers yn Kernow.

“Pur wothus ov a bubonan yw omvyskys.”


Cornwall Council has been given an “outstanding” rating for its children’s services, in an Ofsted report published on Tuesday.

Now, children’s services in Cornwall are among the top 10% in the country. Cornwall Council is the only authority in the South West region that has been judged “outstanding”.

The inspection took place in October. Its focus was on the quality of care for the most vulnerable children in Cornwall.

Director of Children’s Services for Cornwall Council, Trevor Doughty, said: “The inspection focuses on the council’s children’s services. But this achievement shows the way in which the council and its partners work together to improve the lives of children and young people in Cornwall.

“I’m very proud of everyone involved.”


Daskwerther a wara rag babanes, Mothercare, re leveris y fynn ev mos yn menystrans, drefen bos y negys yn Ruvaneth Unys ow fyllel.

Mothercare a leveris nag o y nownsek gwerthjiow ha tri ugens “na lesek na sostenadow y’n eur ma”. Menystrans a alsa gorra dew vil, pymp kans a sodhow yn peryl, a-dreus an RU.

Ny’n jeves an kowethyans marnas unn werthji yn Kernow, dhe Druru, mes gwirhaval yw y fydh hemma nasyes. An deklaryans a dheu wosa an kowethyans dhe waya an negys dhyworth le bannek yn kres an cita dhe bark daskwerthans dhe Dreliske, yn oryon an cita, nans yw unn vledhen hepken.

Mothercare a geworras y pesya y skorennow kenwertha herwydh usadow y’n pols ma.

Skorren yn Karesk re dhegeas seulabrys hevlena.


Baby goods retailer Mothercare has said that it intends to go into administration because its UK business is failing.

Mothercare said that its 79 stores were “neither profitable nor sustainable at the moment”. Administration could put 2,500 jobs at risk across the UK.

The company has only one store in Cornwall, at Truro, but it’s likely this will be affected. The announcement comes after the company moved the business from a prominent site in the centre of the city to Treliske, on the outskirts of the city, only a year ago.

Mothercare added its branches would continue to trade as usual at the moment.

A branch in Exeter has closed already this year.


Res veu dhe gemeres reun yowynk shyndys yn jynn ebron dhyworth Kernow dhe Tyneside, awos fowt a spas dhe gresennow sawyans teythyek.

Kevys veu an kolyn dhe Borth Treth. Yth esa lies goli yn y dhewbaw, ha didhowrys (‘dehydrated’) o, re voghes y boos.

Byttegyns, leun o kresennow sawyans oll yn soth an pow, awos seson kolynya bysi.

Yth esa an nessa kresen gavadow peswar kans mildir a Gernow, dhe Tynemouth Aquarium. Ytho, neyjys ena veu an reun, der Ayrborth Newcastle.

Skittles, dell veuva henwys gans mayni dhe “glavji reun” an dhowrva, a vydh dyghtys ena erna vo ev krev lowr dhe vos delivrys dhe wari.

Susie Lovick-Earle, hembrenkyades a sawyans reun dhe Tynemouth Aquarium, a leveris, “Lowen on ni dh’y witha omma, bys pan vo ev yagh lowr dhe dhehweles dhe’n mor arta.”


It was necessary to take a young injured seal by aircraft from Cornwall to Tyneside, because of a lack of space in local rescue centres.

The pup was found at Portreath. There were many wounds in its flippers, and it was dehydrated and underweight.

However, all rescue centres in the south of the country were full, due to a busy pupping season.

The nearest available centre was 400 miles from Cornwall, at Tyneside Aquarium. So the seal was flown there, via Newcastle Airport.

Skittles, as he was named by staff at the aquarium’s “seal hospital”, will be treated there until he is strong enough to be set free.

Susie Lovick-Earle, leader of seal rescue at Tynemouth Aquarium, said, “We’re happy to look after him here, until he’s healthy enough to return to the sea again.”


Kochyas an Vorladron Gernewek, Gavin Cattle, a lever re beu gwayn y bara dhe Nottingham, gans tri foynt warn ugens dhe beswardhek, “kenerthas brysoniethel meur”.

An gwayn a dheuth pymp dydh wosa an Vorladron dhe fyllel etek-naw, tre erbynn Newcastle.

“Ni a wor fatel o an gwayn omma troboyntel ragon yn frysoniethel,” a leveris Cattle.

“Y’n termyn eus passyes, ni re fyllis gwari hag ena y wul arta. Ytho, pes da ov y hyllyn ni dos dhe-ves dhe Nottingham, y’n gewer euthyk ma, ha gwaynya. Nottingham yw para kales. Hwi a alsa gweles delit an vebyon dhe benn an fyt.”

Nessa fyt an Vorladron a hwer hedhyw, dhe hanter wosa diw, erbynn Ampthill dhe’n Mennaye.


Cornish Pirates’ coach Gavin Cattle says his team’s win at Nottingham, by 23 points to 14, has been “a great psychological boost”.

The win came five days after the Pirates lost 18-9 at home against Newcastle.

“We know how crucial the win here was for us psychologically,” said Cattle.

“In the past, we’ve lost and then done it again. So I’m pleased we were able to come away to Nottingham, in this horrible weather, and win. Nottingham are a tough side. You could see the boys’ delight at the end of the match.”

The Pirates’ next match takes place today, at 2.30, against Ampthill at the Mennaye.


Yth esowgh hwi ow koslowes orth ‘An Nowodhow’ war BBC Radyo Kernow. An dowlen an seythen ma a veu skrifys genev vy, John Prowse, ha pennskrifys gans Steve Harris. Bys dy’Sul nessa, dohajydh da dhywgh hwi oll.


You are listening to ‘An Nowodhow’ on BBC Radio Cornwall. This week’s programme was written by myself, John Prowse, and edited by Steve Harris. Until next Sunday, good afternoon to you all.